МоллагIа цхьа дика хIама хьатIа ца эцаш, дIатетташ хилча, вай боккхийча наха каст-каста оалаш да: «Дика хIама хьарама даь ма дий вай». Уж дешаш дагаух сона вай йоазонхоша 11-12 шу хьалха Беков Тембота цIерагIа йола преми хьае аьнна тIаийца, кхажж тесса хинна моттиг дагаехача. ХIана лаьрхIадар цар къаьстта Тембота цIерагIа из преми хилийта?

Цкъа-дале, гIалгIай йоазув кхеллачул тIехьагIа, Мальсагов Зоврбика аьтта кулг, тешаме оагIув хинна, лаьтта саг ва из. ШозлагIа-дале, эггара хьалхара гIалгIай поэт ва, кхозлагIа-дале (из эггара лоархIамегIа а хет сона), вай къаьнагIа мел бола йоазонхой (Хь.Осмиев, Б.Зязиков, И.Базоркин, Хь-Б.Муталиев, С.Озиев) цо наьна мотт хьийха, нийсача новкъа баьха хиннаб.
Из преми хьае аьнна соцам тIаэцача хана, кхетаче дIахьош вар халкъа йоазонхо Чахкиев СаIид. Цу хана Йоазонхой союза правлене председатель вар из. Цига бар кхыбола вай гIорбаьнна деша говзанчаш а: Дахкильгов ИбрахIим, Аушев Султан-Хьамид, Угурчиев Азмат-Гири, Мальсагов Або, Албогачиев Муса,Хамхоев Ваха, кхыбараш. Вай мехкарча дуккхача къамий йолаш я йоазонхошта телаш йола премеш. Вай хIанад тIаккха массадолча хIаманна ираз дайна? Вай книжни издательство а яц, йоазонхой правлене болх бу цIа а дац, преми я аьнна цIи хилийта деш хIама а дац. Кхыча къамийчарел эсалагIа хиннабац, хIанз а бац вай йоазонхой. Вайцига а гаьнна арахьа а бовзаш хиннаб халкъа дикагIбола йоазонхой I-Хь. Гойгов, А.Боков, С.Чахкиев, Дж. Яндиев, И. Базоркин, М-С. Плиев, кхыбараш. Цар никъ дIахо дIахьош, литературанна юкъе толамаш доахаш хьабоагIа тахан романаш язъяь нах: Кодзоев Iийса, Кодзоев Тимур, Матиев Iаббас, Картоев Мурад, кхыбараш. ХIана мегац цар хьега къа духхьал хоастама дешашца даьккха ца Iеш, ахчанца белгалдаккха. Уж бIаьхий хилар кхер мотт сона вай. Цох-м кхера дезац, сона вайнавац вIаьхий волаш укх дунен чура дIаваха йоазонхо.ГIалгIайвар къаьстта а.
Кхычахьа, вай мехка субъекташка, массанахьа йолаш я-кх уж премеш. Л.Толстой цIерагIа преми я, А. Пушкина, С. Есенина, И.Бунина, А.Фета, М.Шолохова, кхы а дуккхачар цIераш лелаеш я уж. Москверча яздархой «Венец» аьнна цIи йолаш преми я. «Огонёк» яхача а кхыча журналий шоай премеш я. Бакъда уж вай йоазонхошка хьакхачац, цар йоазош цу премешца белгалдоахарел эсалагIа деце а. ХIана эцац вай Правительство из дош дIатIа, хIана гIерт йоазонхоша яхар кагде? Ахча доацилга хургда цун из. Из преми хьае аьнна соцам баьча хана, гIорбаьннача деша говзанчаша белгалдаьккхадар, доккха ахча долаш хила езац из преми, нагахьа санна вай паччахьалкхенна из Iаткъаргдолаш дале, символически хилча а кхоачам ба. Цул совгIа, хIара шера тела а езац из, цунца белгалдаха мегаргдолаш йоазош вай къамах болча наха даьдеце. Цох дукха дийцад. Оалаш ма хиллара, бетташ-бетташ кхера батI. Из дош мичча хана цкъа вай хьакимий дегаех а хьокхадала мег . Цунга чIоагIа сатувса лов.

С.Арчаков,
йоазонхо

Сердало