Са наьна мотт! Малав, хьо къе ба, яхар?
Цунга ях аз: довзац хьона вахар!
Даьккха тур да из моастаг1чунга бувцаш!
Цун денал дохадеш, син пхаьнаш лувцаш.
Езачунга бувце, да тайжа шовда,

Ма кхера! Хьо цун к1оаргаленга кховда.
Короргда хьона дошув – дотув, зизаш,
Дог ма 1абба, езар безамах юзаш.
Наьна мотт я Даьша хьалъяь Г1ала!
Из вайна совг1ата беннаб Дала!
Цкьаккха х1ама дац, халахь, цун маьхе!
Из я хьона, вай са доалла Даьхе!
(Плиев М.- С.)
Вай даьшеи ноаношеи дукхача б1аьшерашка бийца а бувцаш а, хьабоаг1а г1алг1ай мотт. Вай даьша-м цхьаккха эрсий дош юкъе ца доаладеш бийцаб из мотт, царна ховш а мича хиннаб цхьа наггахьчоа мара эрсий мотт. Г1алг1ай мотт вайна даьша йита, цхьанна х1аманца оза йиш йоаца ганз я. Г1алг1ай б1аьш т1ехьенаш хьалкхеяьй наьна метто 1омадеш царна эздел, хьаькъал , тийнад царна къонахчал, денал, доазув доацаш Даьй мохк-беза, ларх1а 1омабаьб. Г1алг1ай меттаца дувзаденна да сага вахар: культура, кхетам, вай къаман 1аьдал. Вай х1аране декхар да из лебе, шаьрбе. Тахан вайна юкъе г1алг1ай мотт ц1ена бувца ховш, язде ховш а дукха бац. Из деррига а хьадоаг1аш да ц1аг1ара а ишколашкара а. Да а нана а эггара хьалха деша дахача беро наьна мотт мишта 1омабу хьажа декхарийла ба.
Оалаш хезад сона эрсий метта хьехархош, ц1аг1а бувца беза эрсий мотт из шаьрбе, аьле. Х1анз хьа мел хозача эрсий мотт бувцаш хилча, мишта хургда из ц1аг1а бийцача, маца 1омабергба т1акха вай г1алг1ай мотт? Наьна меттал дешар а йоазув а 1омалац оал дукхаг1чар. Из деррига а бахьан да. Кхыча къаман метташ 1омадеш, вай берашта кхы а ч1оаг1аг1а уж шаьрде репетитораш а увттабеш, царна ахча телаш ма лелий вай. Уж метташ а вайна накъадаргда. Вай мотт 1омабе духхьал безам мара мича эш. Ма ч1оаг1а хоза хеташ ладувг1а аз къоаночунга, вай наьна мотт ц1ена, хоза лебеш волча! Вай наьна мотт бувцаш газеташ т1а статьяш араювл, къаьстта «Сердало» яхача газета т1а, из бувцаш телевиденеи, радиои передачаш ю. Мах баь варгвац вай метта. Из ларх1а, цун сий де а, ма могга из дег1абоалабе а вай декхар да.
Материал кийчъяр

Дзовр-наькъан Аза

Сердало