Х1анз дийна воацача цхьан новкъоста дийцар сона ер х1ама. Аз из д1аяздергда, е сагага дувцаргда, аьнна, цунна дага а дацар. Юкъера ха мел йолча вайна дага ма доаг1ий Редантера Д1аьха Дукъ яхача г1алг1ай юрта водаш, Тийрках дехьавоалаш хинна хьалъэлла илла т1ий. Машен лелаш дацар из, г1ашлой мара. Пхийттех шу хьалха д1адаьккар из т1ий х1ираша, г1алг1ай Тийрка йистерча юрташка чубутаргбоацаш соцам бича.

Бурот1ара ц1адоаг1аш, из т1ий б1аргадайча дийцар цо из, шеко йоацаш, тамашийна х1ама:

«Со арме вахалехьа к1еззига хьалхаг1а дар из. Да Алма-ате а ваха, цун «Волга» хехкаш лелар со, Буро т1а а, кхыча моттигашка а ухаш. Харцахьа к1аьнк вар со: аз ца деш наггахьа мара во х1ама дисацар. Со машена т1а хайналга хайча, х1алаквергвар со дас, х1аьта а, из ц1аг1ара араваьлча, руль бе боллар аз, минот ца йоаккхаш. Нанас ц1аккха д1адувцацар аз леладаь харцахьа х1амаш, йийтта со вера кхераш. Дарий аз а дицар.

Иштта лелаш вар со Бурот1арча институшкара мехкарий болча ухаш, ресторанашка сакъердаш. Юххера дена хьат1акхаьчар да ц1акхача веза ди. Алма-Атера самолет Шолж-г1алийт1а йоаг1ар; из хьакхоача сахьат ха а ховш, парг1ата вар со. Шолж – г1алийт1ара ваьнна автобусаца Буро т1а хьалвоаг1ар из, т1аккха цига Ж1айраха йоаг1ача автобуса т1а ховра. Б1арча ди дар сога сакъерда а, сакъийрда ваьлча, машен йила а.

Делкъел т1ехьаг1а, диълаг1ча сахьата, дикка машен йила а йила, ц1авоаг1аш латтар со. Ц1аьхха, Редантера аравоаллаше, хьалъэлла улла т1ий долча со кхоаччаше, д1аяйра са машен. Дерригача дег1а т1а г1олла зулам бедар сона. «Укхаза латташ, сахьат далале сона т1акхоачаргволча даьна со б1аргагойя, автобусача мел бола нах б1арахьожабергба-кх цо сона», аьнна, дагадехар. Еттара, лазара сагота вацар со; наха хьалхашка эхь хилар кхерар.

Даггара машен д1аяйна бахьан лаха со хьежача, из корадоаг1аш дацар. Машен лоталуцар, денна х1ама санна.

Иштта со йиш еха латташ, гаьна йоацаш Ж1айрахара 1ойоаг1а автобус сецар. Цу т1ара 1оялар цхьа кхелета йи1иг. Сона хетаргахьа, Кашет1а бахача Гамбота наькъан яр из. Йи1иг т1ий долчахьа йолаелар.

Со хьежача, дукха дийлхача дог1аша 1аьрждаь, шердаь Тийрк т1ийна хьалхашка г1олла а доаг1ар, халла мара со а дехьавоалалургвоацаш. Са ц1ог1а тоха кхелехьа, хи чу д1ачуяьнна йи1иг йодайир Тийрко. Цун даьх-наьнах даьллача иразах, гаьнна 1очуулла дака ткъовро лаца кхийра цунна. Цу миноте Тийрка чу кхоссавалар со. Дикка сай когаш ч1оаг1беш, хил дехьа а яьккха, т1ий т1а д1ат1аяьккар аз йи1иг. Т1арш мо т1аьда а йолаш, яхар из, сов кхераенна, йистхила ца могаш. Гаьна яха езар цун, бакъда, ди д1айха дар, никъ бовзаш бар, цудухьа со сай машен йолча юхавера. Дикача оаг1орахьа д1адийрзар диц а денна, сай бала юха дагабехар сона. Сахьат ха мара йисаяцар ц1авоаг1а да сона т1акхача…

Т1аккха фу хилар ала аз хьога?

Б1аьзза, ззарзза айса к1алт1адаьккхача тайпара д1оаг1а аз к1алт1адоаккхаше, цхьаккха х1ама ца хилча санна, атта лотаелар машен…

Р. Цуров
сердало