Тахан наьна мотт ц1ена лебе ховш дукха бац вайна юкъе. Цу г1улакха башха сагота боацараш дукха ба. Вай мотт ха х1аравар декхарийла ва. Телехьежархо хина вайна юкъе моллаг1а вар 1охайча, зе йиш я г1алг1ай мотт вай мишта лебу.

Иштта царех цхьа передача д1аязъе лаьрх1ар аз; «Фуд хьажа вай» яха.
Наькъаштара кхерамзле лораяра къаьстта терко е йоаг1а цу деша бехктокхаме йолча службаша. Наькъаш¬т1а лоа дилла, шо хина хаоттарца, дукха зуламаш, хатараш хул юххьанца 1а д1адолалуш. Х1аьта, ахкан декъача наькъашт1а лийна водителаш, ц1аьхха лора¬бала а шортаг1а лела да1амалца, 1ан хана наькъашта¬ра ц1енхаштт1а болх лоаттабе беза. Цу деша малаг1а кийчо яьй «Ингушавтодор» яхача урхалено.
Корр:
- Мухьмад, хьанзарча денна оаш яь кийчо миштай? Г1ум а цунца в1ашаг1ийна тух а, цхьацца смесь хила ма езий шун. Мел заготовка яь, фуд шун, деррига шоай балхах алар дезар сона.
Жоп:
- Ер шийла ха хьат1айог1алга ховш, лоа хургдолга ховш, тха йола техника а, вот, г1ум заготовить даь, процентов где-то под восемьдесять от расчетного объема, дукха заказать дича тух довргда, кхо де ма дезий из, ахча ма доаккхий цох. Таханара кхоачам – тух да тхога в наличии, г1ум я, приготов¬ленный смесь я на всех участках.
Корр:
Тахан вай республике д1алаьрхачул техаг1а, шун кара дола наькъий д1оахал мел да, 1ан замах оаш т1ахьожам ло¬аттабеш?
Жоп:
1ан замах оаха кийчо е езаш, содержать де дезаш где-то под 400 км да. Уж да внутренний районашка чура дараш, городской улицашка дараш, еррига улицашка чура дараш, го¬родской улицашка д1алаьрхача хул из.
Жоп:
Тахан, х1ара метте цхьацца участок я Малгобеке, Джай¬рахье, Назране, Сунженски районе.
Корр:
Эггара хьалха шелал маца эттар вайна? Шоалаг1а дека¬бре дарий из?
Жоп:
Дар. Цу бийсана тха болхлой барх1 сахьат д1алалца болх беш хилар.
Корр:
Аз х1ана ях аьлча, машенаш лозаеш а, в1ашкаетталуш а, моттигаш хилар вайна. Бурок1ал цхьа подъем йолаш моттиг йий, циггача цхьа доаккха хьоалчаг1а долаш санна гулъенна хьат1а ца йоалалуш машенаш латтар, сайрина со чуводаш.
Жоп:
Из федеральни никъ ба 1а бувцара, из тха кара бац.
Корр: Бурок1алара Пхьилекъонгий юрт 1ободар шун бе¬ций?
Жоп: Из тха ба, цига тха нах латт. Шоай алапи оттадаь, подъем мел йолча нах ба тха массанахьа г1ум тувсаш.
«Ингушавтодор» яхача урхален г1олла доал деш Назране я керттера кхо улица: Оскановеи, Муталиевеи, Тутаевеи.
Корр:
Укх Назране вай хьаийцача дукхаг1а наькъаш шуга да е ПУЖКХага да?
Жоп:
Наькъаш лаьрхача царга да дукхаг1а, х1анз тхога основ¬ной поток ераш да. Вешта дукха наькъаш мА дий укхаза.
Корр: Т1аккха х1анз 1ан замах шоай них тоъаргба аьнна хетий хьона, шоаш бехктоккхаме йолча моттиге, тешаме ер 1а чакхдаккха, кхоачамца а, техникаца?
Жоп:
Тха 1ан заман чухь техника а я нах а ба, хьинаре болх беш.
P.S. Передачай авторо д1алебер ц1ена г1алг1ай мотт бале а, цунга юха хьабувцар эрсийчунца в1ашаг1ъ1ебаь г1алг1ай мотт. Иштта бувцаш бола мотт дукха хаза йиш я миччахьа а.
Д1аяздаьр ДЗОВР-НАЬКЪАН Аза

«Сердало»