Главная Стартовой Избранное Карта Сообщение
Вы гость вход | регистрация 28 / 03 / 2024 Время Московское: 8457 Человек (а) в сети
 

Лаза ма яйла сага царг…

Цу ловца т1ара язде ловра сонна сай муг1араш, х1ана аьлча вай мехка царг лаза йоалаш хилча моттига ха а лаха еза…

Хийла даьна из, бакъда, къайле-м яц. Х1аьта а из цаховраш а нийслу.
Иштта, укх деношка царго дуне готдаь, яха хиннай са турпалхо царгий дарбан больнице. Магасера мега дарбан кхуврч бувцаш хеза-м хиннай ер. Мадарра цу чура сурт шийна дайза деце а. Яха ер д1ачуяьлча, лора т1аводаш, доккхача концерте мо, йоккха арг1а хиннай. Цул совнаг1а цу концерте мо, д1адехаш каьхаташ а хиннад, царна юкъе паспорт а полис а.
Ца1 доацаш-м д1адехац уж, мича хов космосера шпион хуле, лорий къайленаш гучаяха вена... Киса каьхаташ доацачо-м даха дог а дац, царг меттел деррига мочхал доацаш вусаргвале а. Из кхетаде деза вай мехкахоша. Полисаца бувдаьнна леле, дарбан учрежденеш шоашта мут1ахьа хургйоацалга диц ца а деш. Х1аьта, денна а бусса цунца хийра ца доалаш, т1адувха барзкъа мо, шийца леладе дезаш каьхат хиннад из. Лазар хаьтте мича доаг1а…
Массаза дага мича латт ер каьхата 1аьдал хилар, ший чу т1ара йоалаш са турпалхо а хиннаяц.
Укх лазача балаца юха Наьсаре г1оргья со, узам боалаш, кхайкам баьб къорача дегашка.
Хьалхарча бусса лазаро хоам бича-м, миччахьа воде а, 1окиса долларгдар из паспорта полис а…
Дарбан кхуврч болчара сурт б1аргадайча, ше кхетадеш санна, геттара корзаг1ъяьнна хиннай, унхочун яла хьайна царг. Арг1а лацарах дог а дилла, махулла сиха лора т1акхача, бухь биллаб цо «частни» оалача Наьсарера клинике. Цигара лоро а, снимка яккхийта аьнна, юхахьожаяьй Магасе хьайийлача царгий дарбан больнице.
Миска, наха парг1атон хьайийла цхьа йист ма йий ер аьнна, яха д1аэттай царгий лазар дайдаларга сатувсаш йола унахо. Бакъда, царгах йистйоале а, лазаро дуне баьддерзадой а, шек д1а-м хиннабац царгий лазар фуд ца ховш бола лораш.
Ай, мичара, дайду царгий лораша лазар! Кхы де х1ама доацаш ба уж…?
Цига а ший амараш да лораш арадоахаш. Вешта, уж арадоахар уж ба, е унахц1енон министерсво я, е кхыбола харца низ ба ха-м хац сонеи нахаи. Цхьабакъда, уж тамашийна амараш лорий кхуврчашка а кхыча учрежденешка а вайцига долаш хилара шеко яц. Керттера цар белгало я – цхьаннахьа доацача тайпара уж хилар.
Ший бала кодабича, хьо фу де енай Наьсарера яьнна Магасера лораш болча - аьнна, д1айхача дешашца, хоза наьха санна й1охъеш, т1аийцай из д1ачуваьннача баг1ача регистратура болхлоша.
- Йоле хьай Наьсаре, хье хиннача «частникаш» болча г1о.
- Ай, х1анз ха яц сога, укхаз балха я со, е шо «стрелочникаш» дац со д1а-юха хьежае. Долла х1ама д1адаьлча, кхы Китай мехкара ена мичай со… Лазаро готвича мара шоана т1а а ваг1ацар вайнаьха саг. Лазайоалача хана, Наьсаре хержаяр са царго. Хьалха а цига иха я со. Царго деча лазаро моттиг къоастаяц, боккъал т1аэца со аьлча а, х1ама хиннадац.
Бокъо яц, шоай чу т1ара боалаш хиннабац к1ай дувхара «аьлий». Цу лазарах хьаваргвеце а, ц1ий хьийдда бага чов яле а, «бокъо» толхаергьяц сона бийцараш. Юххера, ер д1аяха сухалбе лаьрх1а йоацилга кхетадича, г1о хьай бала бувца царгий лорага, цо хье т1аэце хьажа, аьннад к1аларчар. Бакъда, цун т1аяха каьхатацара пурам хургдац хьона, бага мел йола царг лазе а. Иштта, 1имерза накъаяьккхай царгий бало готъяьр. Юххера, цхьан сахьата лор хьаварга а хьийжа, т1акхаьчай ер царгашта снимок йоаккхачоа.
Ха а моттиг а нийсъяь, ший царг лазаяларах бехказ а яьнна, миска лорага кодабе йолаеннай бала. Бакъда, лора-м «частникаш» хьожаваь саг, моастаг1аша хьожавича мо мара, т1аэца лаьрх1а х1ама хиннадац, е ладийг1а хало ца еш, балех едда шоллаг1ча кабинете хьалчуиккхай.
Тхоай лораша хьат1ахьожаваьчо мара, снимок яккха тха бокъо яц – хьааракхайсад цо дог хьоасташ дола дешаш.
- Ай, шун лорашта х1анз юха т1аяха эттача, цкъа-дале, хьадала каьхата пурам дац, оаш номерок оалаш дола. Шозлаг1-дале, х1анз цига латта арг1а а йоккха я. Царго кхетадац йоккха арг1а яха х1ама, е хьайна лазар т1ехьтаттац цо. Х1анз укхсахьаташке, ший мукъамца сога узам байтарах т1ера я из. Царгах баккха бехк бий?! Укхаз-м дийша адамаш а кхетадац лоадам боаца х1ама…
- Из са бала бац. Со царгаш кхетае хоаяьяц. Тха бокъо яц.
Доккха зулам даь, топаш тоха суд яь чубоахкача наха а, царг лазаяьлча, г1о ма дора…
Х1ара снимка жоп дала дезаш я со, хоададаьд къамаьл лоро.
- Даьра. Тахан снимка мара ца лой 1а жоп, кхоана-м, кхоана доаг1ача къематдийнахьа х1ара деша дала деза хьа из.
Цхьабакъда, дика дар-кх тахан из тела дезаре, Дала ца лой а, шоашта т1абахкача хьакимашта мукъаг1а, къаьстта к1айча дувхара болхлоша.
Са новкъост-м хала-атта цу лазарах к1алхаръяьннай, лоамарочоа а дайна, х1аьта царна шоашта хала деций-хьог1, сел г1ожача къорача дегашца укх дунен т1а баха?!
Гучох, наьха са даа кийчъяь бокъонаш геттара ч1оаг1а лелаю цхьаццаболча, каьхата ларах баха г1ертача болхлоша. Вешта, беррига цар бехк бац из. Адамий мотт бицбеннаб царна, каьхата мотт кхетабеш санна, кеп увттайой а. Институте хьехац из мотт, тахан даьй-ноаной х1аьта а кхоа мича бу…
Бу теха, г1ожал-къизал чуйижай наьха дегашка. Из ийрча сурт, д1а-юха доала лазар мо, даржаш латт массанахьа.
Из иштта децаре, е муг1араш язде сона а дагадохаргдацар.
Г1ожал дегашкара эккхае вай хьакимашта ца моге, вай къина воаш делхадезача отташ латт хьал. Х1аьта цхьацца хьакимий дегаш а литта дезача кхаьчад. Наьха духьа, дукха рузкъа д1а а дахийта, б1арг хьоасташ хьалъяь керда г1ишлош, дог хьоасташ хила еза. Дерригаш оарцаг1даьнна, АДАМИЙ мотт боаржабе беза наха юкъе. Цунца вай хийра мел доал, къаман г1улакх тишлу.
Х1аьта, дика дар-кх адамий мотт кхетабеш бола нах, цар балха говзала нийсса лоарх1аш, балха д1аийборе. Каьхата мотт 1омабайта-м аьттув лохаргбар вай.
ТЕРКАКИЕВА Аьсет

Вы можете разместить эту новость у себя в социальной сети

Доброго времени суток, уважаемый посетитель!

В комментариях категорически запрещено:

  1. Оскорблять чужое достоинство.
  2. Сеять и проявлять межнациональную или межрелигиозную рознь.
  3. Употреблять ненормативную лексику, мат.

За нарушение правил следует предупреждение или бан (зависит от нарушения). При публикации комментариев старайтесь, по мере возможности, придерживаться правил вайнахского этикета. Старайтесь не оскорблять других пользователей. Всегда помните о том, что каждый человек несет ответственность за свои слова перед Аллахом и законом России!

Комментарии

Вс, 30/06/2013 - 14:49

Ший Дяла кхолламца иштта гучабоахабалар шоай болх хьа ца бераш, т1аккха къезигаг1а хургьяр вайна юкъе жуккаргаш.

© 2007-2009
| Реклама | Ссылки | Партнеры