Ва эздий къо́нах из Султан-Хьажа,
Из хьаваьнна моттиг лерхIаме я.
Цун даь-да́ Шейх-БатIал Сурхо тIара Хьажа
Меттара воккха овлияъ ва.

Къурайша доккхача тайпана ба уж,
Дикача ХIа́шима цIенах баьннаб.
Тахан укх дунен тIа сийдолаш ба уж,
ЙоагIа моттиг хьалаьца, уж дIаэйттаб.

Даьх-наьнах къаьста́ча бога ца хьожаш,
Из теркал ца деш, Султан Iийнавац.
Таронна ийша миска ца хьоасташ
Цхьа ди сайренга цо дихьаьдац.

Унхочунга хьажа ваха́ча сага́
Да́ла боккха маьл яьзбу, йоах.
Лазаро лаьца моллагIа нийсвелча,
Дилла маьл баьхаб Хьажочо цох.

Султа́наца лерхIам берригача наьха,
Дувцалга йоацаш, геттара ба.
Иштта на́хаца лерхIам а болаш,
Укх дунен тIа тарлуш из ваьха ва.

Хиннав из дунен тIа накъавоалаш эшача,
Мехка юкъарле хоза лораеш,
Адамашта юкъе цатоам нийсбелча,
Вахе, къахьийге, из дIабоаккхаш.

Из юкъеваха́ цхьаккха маслахьат
Хьа ца хулаш диса́ ма да́ц.
Цо́ хье́хам бича, эгIазлон баь шод
Хьа ца боасташ цаI Iийнава́ц.

Да́ла енна ха йисте́ а яьнна,
Ший Даьла кхеле из дIавийрза́в.
Из вовзаш хиннача дерригача халкъа́
Цу дешах боккха бо́хам баьннаб.

Дуккхача мехкашкара цун доккхача таьзете
ЛерхIаме хьаьший дукха ихаб.
Шоай дегаш делхаш, болаш гIайгIане,
Цунах кодам бе уж тIаихаб.

(Дала иман, сабар лулда вайна!)
А. Матиев