Сихача боралца, елакъежаш,
Медсестра я йоагIаш,
Унахой ба цунга хьежаш,
Дег чура ловцаш доахаш.
Баркал хилда шоана, йижарий,
Оаша мел леладеча гIулакхах,
Лакха латталда даим шун сий,
Бийца воалалургвац шун мах!

Февраль бетта 2-ча дийнахьа Шолжера пожарно-спасательни колледже «Сестрински гIулакх» яхача профессе презентаци хилар. ШоллагIча курса шин группо, шоа-шоай къаьстта тема белгала а яьккха, тайп-тайпарча хьалашка медсестраша хьош бола болх миштаб дийцар. Албакнаькъан Хизира Асяй группо «Хирургияна юкъе сестрински гIулакх» яха тема кийчъяьяр. Дешархоша сестрински гIулакх дукха хана денз мишта хьадоагIаш да а, цар тIабувха гIирс мишта хувцалуш хиннаб а, цар шоай балхагахьа лелаеш йола инструменташ малагIаш я а дийцар. Вешкарнаькъан Японца Фаризай группо «Гериотрияна чухьа сестрински гIулакх» яха тема кийчъяьяр. Боккхийча унахошка хьажара тIабахийта беза теркам лакха хиларахи артериальни гипертензи яхача лазарахи дийцар цу групперча дешархоша.

Хьежачара самукъа а доаккхаш, шоаш гойташ долча хIаманца чам лакхагIа хургболча тайпара, сценкаш увттаеш, иллеш а доахаш, безаме дIайихьар презентаци, хьехархочо ма аллара, къахьегаш хьабоагIаш болча дешархоша. Цу тайпарча презентацеша професси йовзийтарца дешархой кхетам кIоаргабу.

ВЕШКАРНАЬКЪАН Фатима
«Сердало»