Главная Стартовой Избранное Карта Сообщение
Вы гость вход | регистрация 28 / 09 / 2021 Время Московское: 3839 Человек (а) в сети
 

«ГIалгIай меттала бIаь дош»

Укх деношка арадаьннад «Къамаьл ду вай хьамсарча меттала» яхача кепайоазон хьалхара басардара дакъа. Из да, «ГIалгIай меттала бIаь дош» яхаш. Из болх кхоачаш беш цу проектан хьалхалаттараш Селий Мехкара вай новкъостий а вежарий а хулаш кагий нах ба.

Цу басардара тIа белгалдаьха да массадола бесаш. Цу бесашца берий аьттув ба книжка тIа дехка сурташ бес-бесарча къоаламашца дIахо дIакхоачашде а, довзаш доаца дешаш шоашта Iомаде а, шоаш Iомадаьр ца ховча шоай новкъосташта дIахьалхадаккха а.

Цу тIа дехка сурташ дукхагIа берашта хьалхашка нийслуш долча хIаманцара хьаийца да.

Из доацаш, царна берий кино хьожача хана а, вешта вахаре эшача берий кхоачамца а дувзаденна да дукхаш сурташ.
Российский конгресс народов Кавказа (РКНК) яхача юкъарчен дешара проектай департамента кулгалхо Махтибеков ИбрахIим ва из болх кхоачашбеш цу тIехьа къахьегаш вар. Цо дийцар мишта йолаяь проект я из кагийча къамий меттала цу тайпара басардараш арахецар:
«Къилбаседа Кавказа цхьацца йолча шахьарашка дукха тайпара вIашагIкхетараш дIакхихьад РКНК яхача юкъерчено духьал латта хаттараш дувца а дашха а уйла йолаш. Иштта цхьаннахьа гулденнача оаха дувц оттадир кагийча къамий мотт дегIабара хьаькъе фу дича бакъахьа дар-хьогI аьнна дола дош. Из гIулакх чоалхане латталг гуш дар массанена а.

Цига дIа-хьа дийца дош даьшха Iо а дилла тха барт кхийттар Кавказерча кагийча къамий меттала басардараш арадаьхача дика хургда аьнна. Цудухьа эрсий меттал бераш дIаоалаш мел дола дешаш царна шоай къаман меттала хургдолаш шин меттала латташ да уж басардараш.

Иштта цу наькъ тIа дIаболабаь болх ба из, аттув баларга хьежжа кхы дIахо а из дIабахьа лерхI оаха, цу тайпара басардараш 8 книжках латташ хургдолаш».
МоллагIйола проект хьадагайоха а из кхоачашъяь дIачакхъяккха а хала дац, гIо-новкъостал де саг хилча. Амма цу гIулакха оарцагIбаьнна лелачарна гIо деш саг ца хилча аьттув балац из чакхдаккха. Хьашт дале дагадехача дус.

Бакъда укхаза кораваьв оагIо хьаллаца саг. Из шоашта гучаваларах доаккхалдеш ва ИбрахIим:
«BELLF STAR» яхача интерьерный салона кулгалхочо Уллубий Шамсутдинов ва тхона из проект кхоачашъе новкъостал даьр. Цо из болх кхоачашбар бахьан долаш из проект юхасоцаргйоацаш болх дIабахьа аьттув баьннаб тха. Цунга хьежжа кхыча къамах болча наха а цхьацца шоай спонсораш а лахе болх бу шоай меттал уж басардараш арадовргдолаш.

Масала, гIалгIай меттала из арадаргдолаш таржам деш тхона гIо даьр, @Илез_Матиев яха телеграм канал я, хIаьта ахчанца новкъостал даьраш: КПЦ «Эздел», КЦ «Единство» яха юкъарченаши, предприниматель Йовлой Мухьмад-Iаьлеи – уж нах ба. Цудухьа гIалгIай меттала деша йиш йолаш уж 100 дош тIадола 2000 басардараш долаш да. Геттара цунгахьа пайда болаш цхьа хIама хета сона, цу басардарашта тIа гIолла шоай берашкара даьш-ноанош шоай къаман меттала дешаш Iомадар. Тахан бераш меттал боккхагIбараш а лерттIа шоай мотт ца ховш нийслу вайна юкъе.

Бакъда, кIаьд а ца луш вай цхьана къахьеге вай толам боаккхаргба, вай метташ даха а дусаргда».
«Къамаьл ду вай хьамсарча меттала» яхача сере из басардар арадаьннад 11 меттал таржам а долаш. Селий мехкарча къамаел совгIа башкирий, гIалгIай, ногIой, нохчий меттал арадаьннад из. Белгалду аз шоана цу басардара из гIалгIай меттала доаккхаш таржам даь се хилар. ХIаьта лакхе ИбрахIима цIераш яьхача юкъарченаша а новкъостал даьд из книжка вай меттал хургдолаш. ХIаьта къаьстта доккхагIдола дакъа дIалаьца гIо даьд Йовлой Суламбик-молла воIа Мухьмад-Iаьлас. Баркал хилда царна.
Ала деза цу басардарех цхьадола книжкаш вай мехкарча фондашка гIолла дIа-хьа дийкъалга. Цул совгIа уж дIакхаьчад Шолжа района АрштIе, Берд-юрт, Чималха яхача юрташка, Пригородни районерча юрташка бахача мискача дезалашка а.
Нагахьа санна уж басардараш эца чам болаш саг вале уж дохкаш хургда вай мехкарча книжкаш дохкача тикашка.
Цу проекта хьалха латтачар хьаяхачох, моллагIвола саг цу юкъе ва а, дакъалаца а чам болаш вале, цар раьза а болаш из тIаэцаргва. Уж кийча ба метта хьаькъе къахьега чам болчарца цхьана из болх дIабахьа. Мел кIезига дале а хьадича хIама хьахул. Хьинаре къахьега деза дог а ца эккхаш. Вай дай кица да, «ЯьгIача берзал лела цогал тол», яхаш. Къахьегамах пайда боал.

Матенаькъан Илез

Вы можете разместить эту новость у себя в социальной сети

Доброго времени суток, уважаемый посетитель!

В комментариях категорически запрещено:

  1. Оскорблять чужое достоинство.
  2. Сеять и проявлять межнациональную или межрелигиозную рознь.
  3. Употреблять ненормативную лексику, мат.

За нарушение правил следует предупреждение или бан (зависит от нарушения). При публикации комментариев старайтесь, по мере возможности, придерживаться правил вайнахского этикета. Старайтесь не оскорблять других пользователей. Всегда помните о том, что каждый человек несет ответственность за свои слова перед Аллахом и законом России!

© 2007-2009
| Реклама | Ссылки | Партнеры