Главная Стартовой Избранное Карта Сообщение
Вы гость вход | регистрация 29 / 03 / 2024 Время Московское: 9913 Человек (а) в сети
 

Оаш дехкий шоай бераш ага?

Дай кица да. «МагIа баьчче ага ма эшалда вайна, наIара тIехьашка Iаса ма эшийла вайна яхаш». Цун маIан да бераши, боккхий нахи ма эшалба яхильг.
ГIалгIашта юкъе бер агадиллар боккха лоархIам болаш гIулакх да. ВIалла дукха ха яц нах вIашагIа а кхийтте лаьрххIа из гIулакх лакхача боараме айдаь гIалгIаша дIакхухьаш хинна. ХIанз а ба вайна юкъе цу гIулакха нах вIашагIтохаш а цох цIай деш а дезалаш.

ГIалгIай дахчан пхьараша хьадеш хиннад моллагIдола ага. Агаш дукха тайпара хиннад, тховнах хьалдаташ а, дIатеркадеш а, бакъда, тIехьагIо лаьтта латта теркаду ага мара ца дусаш тховнах хьалдоададу агаш вайна юкъера дIадаьннад. Нах дунен тIа мел бахача хана леладинза даргдоацаш эшаш да ага. ХIара цIеннагIа хиннад уж хьалха.
МоллагIйолча фусаме геттара лерхIаме хиннадале а ага, тахан из тIехьашка доалаш латт. Ага чура хьадоагIа бера дегI оздалара а, тоадалара, юкъ готтахилара а, белаж шера хилара а гIо деш да.

Бакъда, вай хана дукхагIча даькъе ага чу бераш кIезига леладу ноаноша. Хьалха геттара хала долча хана а бера дегI чIоагIа хургдолаш, цун хи нийса хургболаш кхай тIа балха болхача хана а ага ги а делле болхаш хиннаб гIалгIай ноаной. Тахан кхай тIа аха безаш а мичаб ноаной. ГIоахкараш эзза дохкаро бера дегI нийсду, кулг, ког, пхьарс, белаж, че, юкъ, пIендараш иштта кхы а дукха маьженаш нийсача апарагIа ерзаю.

ГIалгIай ага чу улла мотт ча чу а делла беш ба. Шовзткъа дии, шовзткъа бийсеи даьлча цу метта чура ча хувцаш Iадат да гIалгIай. Хьалха цхьа ха хиннай воча наха ага меттах маьхий е таьш дехкаш харца балхаш, бозбочалаш деш, цудухьа хIара шовзткъа ди массаза дала метта чура ча дIа а даьккхе цIув хьавийхе цунга текъам байте, тIехьа бера нанас очо а оалаш доагадеш хиннад из, цул тIехьагIа керда ча Iочу а делле кийчабеш хиннаб мотт. Из гIулакх хала дале а харцача хIамах, унах, наьха тарамех шоай бераш лорадар духьа леладаьд гIалгIаша. Тахан а из деш нах ба гIалгIашта юкъе бакъда, хIанз ча хувцаш хилча е тха хувцаш хилча е цIув а е молла а вехац шоаш доагаду, цун маIан а хац дукхагIчарна.

Бер ага диллар гIалгIашта юкъе доккха цIай да, хIана аьлча керда саг тIакхетар, къам дебар боккха кха ба наха. Бер лувчадича ага дуллача хана докъа ма де оал, хIана аьлча, ага чу гIоахкарашца дIанийсдеш долча бера маьженаш тIоадалца нийслургйолаш, йIаьхлургйолаш.
Ага гIоахкараш дIалоацаргдолаш цох боллаш бола чIий, лаьрххIе лахе турс гаьнах баьккхе боллаш хиннаб из. Цох чIиба оал гIалгIай меттал.

Турс гаьнах из боаккх харцача хIама духьала турс дика я яхаш. Цул совгIа, маьркIижа хана харц хIама гаргадоагIа аьле бер сома доаккхаш хиннад, цунна воча тарамаша зулам дергдоацаш. Нагахьа санна бер чIоагIача набарах доалле из цох юкъагIа а ца доаккхаш, кIомалах даьча кIадаца тIера ага дIакъовлаш хиннад.
Ага тIа IотIакхоллаш дола киси когашкахьара оагIо а тIехьа къайлайоаккхаш хила деза, кертагахьа, вешта аьлча гIовге къайлаяккхар нийса лоархIаш дац, бер цIаьхха сома даьлча унзар далале ага тIера хIама хьаяккха кхувргдолаш.

Бер ага дилла йиш йола оагIо аьтта оагIо ба, аьрда оагIорахьа бер ага чу ма дилла оал, хIана аьлча, дуне аьтта оагIорахьа кхест, саг а дуненца гобоахаш, цун тIехьа кхасташ хила веза.

Чана мотт булла бер унах, лазарах цIена хургдолаш, сипа долла бера цIено йича цо тIоадал дIаозаргйолаш, вай хана сипа кога метта памперсаш айттай. Ага чу ца доаллаш кхедаь бер когаш гоама долаш хул. Хийла кIалхара чусатта когаш долча сагага оалаш нийслу гIалгIаша «ага илла веций хьо?», аьле. Цул совгIа тIехк чIоагIлу бера ага чу доаллаш хилча.
Тахан дукхача наьха агаш бадаш тIа латта, цхьан хана шоай нанас, е даь-нанас леладаь да яхаш.

Матенаькъан Илез

Вы можете разместить эту новость у себя в социальной сети

Доброго времени суток, уважаемый посетитель!

В комментариях категорически запрещено:

  1. Оскорблять чужое достоинство.
  2. Сеять и проявлять межнациональную или межрелигиозную рознь.
  3. Употреблять ненормативную лексику, мат.

За нарушение правил следует предупреждение или бан (зависит от нарушения). При публикации комментариев старайтесь, по мере возможности, придерживаться правил вайнахского этикета. Старайтесь не оскорблять других пользователей. Всегда помните о том, что каждый человек несет ответственность за свои слова перед Аллахом и законом России!

© 2007-2009
| Реклама | Ссылки | Партнеры