Repost @vaymott Мехкарий. Бух боацаш оалаш дац вайнаха «ЙоI кхеечо - къам кхеду». Вай мехка цIихеза гIарбаьнна къонахий кхебаьраш вай къаман сийдола мехкарий ба. Къонахий, вайна ма харра, халкъан бIоагIий да, цар баламаш тIа латташ ба Даймохк а.

Ший вахаре вайнаьха йоI, нохчо яле а, гIалгIа яле а, бе яц, массехк никъ тIа гIолла йод. Из я йоI, йиш, нус, фусам-нана, дезалий нана, цIен-нана. БIаьшерашка яхь ца йожаеш хьабаьхкаб вай мехкарий, ка ца агаш, шоашта Далла а, къаман Iаьдало а тIадийхка декхараш кхоачашдеш.

Даймехка хало тIакхаьчача, боха ца бохаш, шоай вежарий, фусам-дай, къонгаш накъабоахаш, укх вай лоамий оамалаш хьалха йоахаш, дегаь мел хала дале а, зовзачун къин тIера ца бувлаш, майра хьабаьхкаб вай мехкарий. Эшача хана герз хьаэцаш, къонахашта уллув бувлаш, къиза моастагIчун ка тохаш, нана-бертий санна лийтаб вай кхалнах. Цар Iобаь, царех бекха, цар кхебаь кIантий, къонахий ца хилча балац.
Майрача кIанта гIожа дог кIаьдадар, цу чу бIаьсте йоаккхар йоI я-кх. Ший оазаца Даймохк хестабеш, вежарий денал дувцаш, безам бувцаш, гIургIажий халхарашца ер дуне сийрдадоахар вайнаьха йоI я-кх.

Даймохк къонахий баламаш тIа латташ бале, Даймехка юкъ-моттиг а, къонахашта из лоаттабе низ-хьинар Iалашдар а вайнаьха йоI я.
Ший хозача оамалашца, гIулакхашца, вай къам эздий деш яр йоI я. Хозал-м ювца а езац. Маьржа яI, цхьана вайнаьха йиIий хозал тоъаргьяр вай къам укх дуне тIа эггара хозагIа да ала.

Кагийнах, лорабелаш вай мехкарий, ер дуне, вахар хозадеш бола. Йиш яле а, нана яле а, йоI яле а.
Дала яхь йолча, эздий, хоза гIулакхаш долча мехкарех совдоаккхалда вай къам!
Уж вай хьалкхуй, къонахий-м цар кхебергбар вайна!
_
Ахмад Шадиев