Главная Стартовой Избранное Карта Сообщение
Вы гость вход | регистрация 05 / 04 / 2020 Время Московское: 516 Человек (а) в сети
 

Интернет: Кхераме нах

Из Интернет яха х1ама дагаехача хьаькъал совдаьннача наха юкъе, шеко йоацаш, цхьа г1алг1а хиннав.

«Гизга маза» - вай оалаш да кегаденнача х1амах. Ха-зама мел йода ер кегалургдолга ховш, ший ц1и ма яьккха аьннад цу шийна вир хиларго! Хьулвенав, моастаг1, шеко йоацаш, цудухьа тахан цун ц1и йовзаш яц, бакъда, лар-м йитай.
Цкъа шун къаьна Теми коа сало1аш ваг1аш Мисилмат гучаяьлар лоалохошкара. Из даьра йоаг1ар хьона когех г1абаш техача сенна, акхал ваьннача саго мо б1аргаш лайжа лекхаш.
- Жи-хье, къаьни, сихха лаьтта йосалахьа! – ях аз. – Х1анз хьо йисаяр вайна фе-уйлашца сигала яланза, хьаькъал т1ехмехкаш мо кеп оттаяь!
Мисилмата-м д1а а хазарий-хьог1 аз аьннар.
– Даьллахьа, цецвала х1ама дисадац укх дунен т1а, - йоах цо. – Лоалохошка со яг1аш, цар арахьа деша ваг1аш вола к1аьнк ва телевизора тара йолаш цхьан х1аман чу къамаьл деш. Из йисте ваг1аш мо хьахозар цо дувцар. «Шкап» яхаш я йоахар мотт сона цар из тамашне, кхийтанзар со дикка…
- Фу дувцар укхо?
- Аьъ, цо дувцар хьона фу бе-башха да, из в1аштехьа доалаш хилар ма дий аз яхар-м! – кулгаш доаржадир Мисилмато.
- Цецваккха йоал хьо со? К1ир хьалха хьона хьа да г1анахьа духьалавеннача хана, цо дош аьнна доацашше, саеи хьайеи пенсех к1ай саг1а дир 1а. Укх харц дунен т1а наха караг1ъяьнна «шкап» в1алла яц бакъдуненца бувзам лоаттабеча сага.
- Хьай багара 1и бахьан жожаг1ата ма г1оргва хьо! – кулг таса яхар Мисилмат.
Ч1оаг1а сакъердам хилар сона хазар тахка. Чувийхар аз лоалахой 14 шу даьнна к1аьнк. Дийцар цо Интернет яхар фу х1ама я маьлха к1ала хьайзача ябакха лордашта са лергаш тараласталца.
- 1а фу дий, дукхваха, са хьоа чувха ца беш, хьаял из нутбок яхар!
- Ноутбук я из, дада. Х1анз со хьавоаг1а хьона.
Хьадера к1аьнко из шайт1а герз. Цхьаькхаза хьалхадаьккхар сона «гугл» фий, «яндекс» мичахьа кхача г1ерт, «скайпе» г1олла фу 1алашду, «одноклассники» яхача поале наха метташца г1алаш мишта йотт. Таккха тахкар оаха тайп-тайпара сайташ я яхачар вай мекхах, паччахьах, къамах мишта язду. «Комменташ» тел оаха, яхаш, наьха хьисапе дукха тамашне оакхарий дайзар сона («Белстрел», «Кабан и K», «Дракошвах», иштта кхыдараш), вайна юкъе «термиТРАКТОР», «топчан-ША», «дозвон» болга хайра. Вешта, цар йоахаш йола «ц1ераш» УАКХ, аьнна, белгалъяха мегаргйолаш я: Уне – Аьйпе – Кхераме.
Аз-м бокъалла ях шоана – «кхераме»! Цхьа ког каша латташе укх вахарцара къаста сихлуш вацар со, бакъда, цу кагийча нахаи мехкараши яздер 1одийшача ч1оаг1а «бесчамный» хийтар сона ше дара. (Са дош доц шоана из «бесчамный», цхьане яздора из иштта). Бога к1алха деллача хьазилга мо ер дуне готта делар, гизга мазо карабигача моза сенна гонахьа духхьала моастаг1ий хийтар: «Аьъ, вахарах набахте я ма бахий яраш-м пхийттара баьнна балелехьа! Акхар-м, хетаргахьа, сигален х1ара ми1инг а тахкай! Боккхача наха юхь т1а дувшаш дола хано кхолла шодамаш дегаш т1а дийшад акхарна-м сов аьйхьаза болаш!».
- Лалла, хьай нутбокаца! – в1алла бехк боацаш вола к1аьнк човхавир аз, т1аккха, декхе ваьнна, соцавир. – Сога ладувг1алахь, дадай вар: Цхьа бутт хьалха хьа да вайнавар сона хьона лиспет ийца воаг1аш. Цкъа-шозза яхар мо из хахкар 1а, бакъда, т1ехарча хана гуш вац хьо цунца сакъердалуш. Цхьа ха йоаг1аргъя – «Лиспета т1а хайна укх дунен гобаьккха балар аз, Интернете ваг1аш се ханал хьалха къа а ца веш», аьнна, хьона хеташ. Цхьаькха да: Кхы «гугл-муглаца», «яндекс-бандексаца» са Мисилмата корта б1агора ма баккха алалахьа хьай наьнага шийна тха бешар хорцам, нарс, хох, иштта кхыдар эше. Америке, Китае фу доал ховш, ший беша доал ца деш вола саг УАКХ ва, йоахар, аргда 1а аз!
Кхетарг-м яц лоалахо аз аьнначох, цхьабакъда хатта а лоарх1арегъяц: Мисилмата боча лелаю беш цхьа моллаг1ча «скайпах» хувцал 1овдал яц из.
ТЕМАРКЪА
Сердало

Вы можете разместить эту новость у себя в социальной сети

Доброго времени суток, уважаемый посетитель!

В комментариях категорически запрещено:

  1. Оскорблять чужое достоинство.
  2. Сеять и проявлять межнациональную или межрелигиозную рознь.
  3. Употреблять ненормативную лексику, мат.

За нарушение правил следует предупреждение или бан (зависит от нарушения). При публикации комментариев старайтесь, по мере возможности, придерживаться правил вайнахского этикета. Старайтесь не оскорблять других пользователей. Всегда помните о том, что каждый человек несет ответственность за свои слова перед Аллахом и законом России!

© 2007-2009
| Реклама | Ссылки | Партнеры