ХIара шера 12-ча мае дездеш да медсестрай ди. 19-гIа бIаь шу долалуш, геттара чIоагIа лоархIам болаш яр медсестрай професси. Цу хана царех кхы а къахетаман йижарий оалаш хиннад, лозабаьча тIемахошта, дехаш хIама а доацаш, цар гIо деш хиннандаь. Кхерамеча тIема хана, гулбале, кхалнах салташта гIо де ихаб.

Цига вIашагIъехкаш хиннай цар унахошта лаьрхIа гIона моттигаш. Шоаш дийша беце а, лоро телача амарашка гIолла Iомабаьб болх дукхагIа мел болча къахетаман йижараша. Таханарча дийнахьа а хоаттам чIоагIа болаш, лоархIам лакха болаш ба медсестраш. Эггара курагIа вола саг а, цамогаш хилча, мелалу. Молхаш теларал, мах тохарал, капельниц оттаярал совгIа унахочоа безам хул хозача дешаца, къахетамца ший дог хьастийта. Нийса оалаш да: дарбах тешашвар сихагIа верз. Цу халача наькъа тIа медсестрас доккха гIо ду, унахошка нана санна хьожаш.

Шолжа района керттерча больнице процедурни медсестра йолаш болх беш я ЦIечой Бахьаудина Аза. ЗIамига йолча хана денз мерзбеннаб лорий болх Азайна. Нанас даим оалар: "Лор хургья хьох, Аза, кулгаш кIаьда да хьа". Ше чуеча, кхыча дезалхошка ца а оалаш, Азайгара дехар нанас кулгашкара шолхаш хьаяхар. ХIаьта зIамига лор, одеколони махи хьа а ийце, нанна гIулакх де ховра. Лор хила дагалоацамца 10 класс якхачул тIехьагIа, 1977-ча шера Грознерча медицински училище деша отт Аза. Цига шин шера дешарца медсестра хул цох.
Къахьегамах диза дар дешара шераш. Азас дийцар, шоай практика йолча хана, ше Наьсарерча больнице хьожаярах (ГIала яьгIача (Крепость)). Каст-каста корах арахьежаш хинна Аза, шийна цхьа моллагIа чов яь е авари яь унахо вахьаш вайча, сиха араийккхе, цунга хьажа йолалора. Хирург, травматолог хиннача Темарзнаькъан Тухана зийна хиннай нахах дог лазаш йола къона дешархо. "Хье дийша яьлча, со волча тIайолалахь",- аьннад цо. Балха араяьла бутт бисача хана, машен наIар тIа а яйта, хьалхе болх болабе дIаех Аза. Дийнахьа човнаш ехкача метте, тIаккха, ди юкъе а дуташ, бийсанарча сменах хулар из. Маьре яхачул тIехьагIа а, ший болх дIахобихьар Азас.

1986-ча шера дехьайоал из Шолжа района керттерча больнице. 38 шу да Бахьаудина Аза болх беш йола. Дуккхача наха гIо даь, дукха тIема човнаш ерзаяь саг я из, ше мел йоаккхача хана, цкъа лорий раьза ца хилар дайна а яц. "ХIетта болх бе йолалуш, хьона халахеташ хIама дарий?"- аьнна, шийга аз хаьттача, Азас жоп делар:"Сона хала цхьа хIама хетацар, даим бийзаб сона сай болх. ХIанз а, балха хьа мел йоагIа, боккхача безамца йоагIа со". МоллагIчоа дег чу южаргйолаш, ший дегIаца хоза гIулакх леладеш, хьайоагIаш я Аза. Кхы а Наьсаре балха йолча хана, хьакхоачашше, сиха лорий барзкъаш тIа а дийхе, хIара палатера унахошка моаршал хатта, Iуйре дика ювца йодаш хиннай къона медсестра. ХIаьта унахой, къаьстта боккхий нах, из Iуйре хьаярга сатувсаш хулар. Лазар гучадаьлча е чов хилча, саг кхералуш а саготдеш а нийслу. Бакъда, Бахьаудина Аза шийга безаме, хоза йистхилча, унахочун сагото дIайоал. Iуйран иттлагIчоа ах даллалца цIий эцаш, кхыйоа процедураш еш хул Аза, цу зIамигача юкъа 50-60 хиллал адам тIаэц цо.
"Ший болх дика ховш, моллагIа унахо ийца со цун тIайоде а, де гIо долаш, дика саг а тIехдика медсестра а я Аза. Бокъонца со ший гIулакха енача санна хьож из, кIезига ба уж моргаш, доккхача алапаца медсестра я из",- хьоахадир моттига терапевт-лора Мейринаькъан Аюпа Марета. Унахо йолча Чахкнаькъан Висангире Дибас дийцар, Бахьаудина Аза унахо волчун а воацачун а гIо де кийча хиларах, дика нана йола медсестра, ший дезалга санна, унахошка хьожаш хиларах. Азайна доккха баркал ала ловчарех ба: вай лакхе хьоахаваь Темарзнаькъан Тухан (Дала гешт долда цунах), мел хинна керттера лораш - Албакнаькъан Iалаудина Мажит, Iарапханаькъан Якъуба Марем, хIанзара керттера лор Сайнаройнаькъан Мухьмада Райхьант, цун когаметта йола Тоачнаькъан Лида, боккхагIа бола медсестраш - Къоастой Марет, Умайнаькъан Аьсет, иштта кхыбараш а.
Доккха баркал ЦIечой Бахьаудина Азайна а хилда, Дала болх беркате болба, ший дог санна, вахар а сийрда хилда цун!

ВЕШКАРНАЬКЪАН
Фатима
"Сердало"