Миштаб из удостоверени хьаэцара духь бахь безаш бола никъ: мичахь дIатаваха веза, малагIа кьахаташ эша, мел ха йоакх удостоверени кийчдеш… Уж хаттараш бахархошта шерагIа довзийтар духь тхо даха хилар къахегамеи, социальни Iалашони министерстве.

Цу урхален дезала хьалех йолча отдела керттера говзанч волча БIархой Тамерлан яхачох дукха бераш долча дезала удостоверени хьаэца вIалла хала дац. Из хаттараш белгалдаьхад ГIалагIай республика правительство баьча 140 таьрахь долча соцам тIа (из соцам бовза таро е сердало блога тIа гIолла: http://serdalo-gazeta.livejournal.com/120295.html).
Цкъа - дале, дукха бераш долча дезалах лоархIаргволаш цу дезале барайтта шу даланц дола кхоъ е кханел совгIа бер хила деза.
ШозлагIа – дале, меттигара къахьегамеи, социальни Iалашони отделени дIатIаваха веза. Цига дIачудала деза укх тайпара каьхаташ: даь е, наьн е паспорт копеш; бер дара тешал (кханел кIезигагIа хила йиш яц); меттигара администрацера дезала оттамах йола справка.
ДIахо, шоагара каьхаташ хьаийцачул тIехьагIа гIулакхчен болхлочо кIир далалехь «Дукха бераш долча дезала» удостоверене кийчдаь шоана дIалургда.
Шолжа района къахьегамеи, социальни Iалашони министерства отделене кулгалдеш волча ЦIечой ТIахIир яхачох, наггахь санна цу дезала шоай каьхаташ хьалха хьачуденна дале(пособе хьаэцащ, е кхыдолла гIулакх) царех бола хоам министерства базе болаш хургба. ТIаккха цу мугIарерча наха удостоверене дIало каьхаташ хьачуденача дийнахь. Из боккха лоархIам болаш да бахача наха шозза цу гIулакха никъ бахь безаш ца хиларах.
БIархой Тамерлан яхачох, таханарча дийнахь вай мехка дукха бераш дола дезал лоархIаш дIаяьзбаь 26694 дезал ба. Цу наха дика гIо до Iаьдало. Къаьстта коммунальни хьашташ дIалуш кIалхьожадац 30 процент декхар, деша дагIача берашта дешара, спортивни дувхарца Iалашо йо, цхьаъ е, шиъ е шу даьннача берашта шураца Iалашо йо меттигара администрацеш, еррига а 12 льгота е.
ХIаьта цу даькъе наьха хьашташ кхоачашдара болха тIахьожам бергболаш министерстве лоаттам вIашагIбеллаб. Цар терко ергъя ханнахь наха удостоверенеш дIадалара, духьал нийслуш йола халонаш юстараяхара.
Из вахаре дика пайда луш дола хаттар тахан дукхачарна дагадоалаш да. Бакъда, дIатохабенна шоай удостоверени хьаэца сагот боацаш лелараш Iаьдала урхалена болхлошта бехка дIатIабале багIаш хул шоашта Iаьдало деш дола новкъостал юкъахдуташ.
Сердало